📍 ठाणे
🗓️ २५ नोव्हेंबर २०२५
कोकण पदवीधर मतदारसंघाचे आमदार अॅड. निरंजन डावखरे यांनी ठाणे, कळवा, मुंब्रा आणि दिवा परिसरातील काही बार, वाईन शॉप व बिअर शॉपजवळ दिवसेंदिवस वाढत चाललेल्या अराजकतेबाबत कठोर भूमिका घेतली असून, याबाबत ठाणे पोलिस आयुक्त मा. श्री. आशुतोष डुंबरे यांना निवेदन सादर करत तातडीने प्रभावी कारवाईची मागणी केली आहे.
निवेदनात नमूद केल्याप्रमाणे, काही ठिकाणी मद्यधुंद अवस्थेत फिरणाऱ्या व्यक्तींकडून सार्वजनिक ठिकाणी गोंधळ, गल्लीबोळात भांडणे, वाहनांना अडथळा निर्माण करणे, महिलांना त्रास देणे अशा घटनांमध्ये वाढ होत आहे. या प्रकारांमुळे स्थानिक नागरिकांमध्ये भीतीचे वातावरण निर्माण झाले असून, कायदा व सुव्यवस्थेला गंभीर धोका निर्माण होत आहे.
अॅड. डावखरे यांनी स्पष्ट शब्दांत सांगितले की, “ठाणे हे सांस्कृतिक व सभ्य नागरिकांचे शहर आहे. येथे अराजकतेला थारा देता येणार नाही. पोलिसांनी गस्त वाढवून, अवैध मद्यविक्रीवर तात्काळ कारवाई करावी आणि नागरिकांना सुरक्षित व शांततामय वातावरण मिळेल यासाठी गंभीरपणे पावले उचलावीत.”
तसेच त्यांनी संबंधित भागात बीट मार्शल व्यवस्था मजबूत करणे, सतत चौकशी ठेवणे, विशिष्ट संवेदनशील ठिकाणी विशेष गस्त घालणे यांसारख्या पोलिस उपाययोजना तातडीने राबवण्याची मागणी केली आहे, जेणेकरून नागरिकांचा विश्वास वाढेल आणि शहराची कायदा-सुव्यवस्थेची ओळख टिकून राहील.
अॅड. डावखरे यांनी नागरिकांनाही आवाहन केले की, “कोणतीही संशयास्पद, अराजक अथवा महिलांना छळ करणारी घटना आढळल्यास विलंब न करता पोलीस प्रशासनाला कळवा. आपली एकत्रित जबाबदारीच शहराला सुरक्षित ठेवू शकते.”
या मागणीमुळे ठाण्यातील कायदा-सुव्यवस्था कायम राखण्यास मोठी मदत होईल आणि शहराची सांस्कृतिक ओळख व सुरक्षिततेची भावना अधिक दृढ होईल, असा विश्वास आमदार डावखरे यांनी व्यक्त केला.
